ads

ads

ads ads

@rwandatoday, Amamaza hano +250 788 625 932...

Dr Isaac Munyakazi yasabiwe n'ubushinjacyaha gufungwa imyaka irindwi naho Gahima Abdu bareganwa asabirwa gufungwa imyaka itanu

by FRATERNE MUDATINYA 17 September. 2020 @rwandatoday 3K Views


17092020051153130ffd74-124b-4e65-a41a-b4024dd649eak-bfaaf.jpg
ADVERTISEMENT



Ubushinjacyaha bwasabiye Dr Isaac Munyakazi wahoze ari Umunyamabanga wa Leta muri Minisiteri y’Uburezi ushinzwe amashuri abanza n’ayisumbuye, gufungwa imyaka irindwi n’ihazabu ya miliyoni eshanu, naramuka ahamijwe ibyaha birimo kuba icyitso ku cyaha cya ruswa, naho Gahima Abdu bareganwa asabirwa gufungwa imyaka itanu.


Byasabwe kuri uyu wa Kane mu rubanza rwatangiye agahana saa mbili n’iminota 40 mu rukiko rwisumbuye rwa Nyarugenge. Ababurana babanje kubazwa niba hari inzitizi bafite, bose bagaragaza ko ntazo.


Ubushinjacyaha bwahawe umwanya ngo buvuge ibyaha bushinja Gahima na Dr Munyakazi, butangira buvuga ko Munyakazi akurikirahyweho icyaha cyo kuba icyitso mu gutanga indonke cyangwa ruswa ndetse no gukoresha ububasha afite mu nyungu ze bwite.


Kuri Gahima Abdu, umushinjacyaha yavuze ko akurikiranyweho icyaha cyo gutanga indonke. Ibyo byaha byose ngo byakozwe hagati ya tariki 10 na 24 Ukuboza 2019 ubwo Gahima yifashishaga Dr Munyakazi, ngo atange ruswa yo gufasha ikigo cye Good Harvest School kuza mu myanya ya mbere gutangaza amanota yavuye mu bizamini bisoza amashuri abanza.


Umushinjacyaha avuga ko bijya gutangira, Dr Munyakazi yahamagaye yahamagaye Dr Sebaganwa Alphonse, Umuyobozi Mukuru w’Ishami rishinzwe Ibizamini n’Isuzumabumenyi mu kigo cy’igihugu gishinzwe uburezi (REB), bagahurira mu mujyi wa Kigali ahazwi nka Camp Kigali. Ngo Munyakazi na Sebaganwa bicaye mu modoka ya Munyakazi, hanyuma Munyakazi amubwira ko afite inshuti ye yitwa Gahima Abdu ufite ikigo, akaba akeneye ubufasha ngo ikigo cye kizaze mu bigo icumi byatsinze neza mu Rwanda, n’abanyeshuri be bakaza imbere.


Ngo Dr Munyakazi yabwiye Dr Sebaganwa ko iyo nshuti ye Gahima anakora mu biro by’umukuru w’igihugu.


Ngo Dr Sebaganwa yaje kubihakana, amwereka ingaruka byamugiraho ariko undi akomeza kumuhatiriza amwumvisha ko namufashiriza Gahima, nawe ntacyo azamuburana mu gihe cyose akiri Umunyamabanga wa Leta Ushinzwe amashuri abanza n‘ayisumbuye muri Mineduc.


Ubushinjacyaha buvuga ko Sebaganwa yaje kumwemerera, baratandukana barataha. Ngo hashize iminsi Dr Sebaganwa, Dr Munyakazi na Gahima bahurira kuri hoteli imwe ku Kimironko, bicara mu modoka. Gahima na Munyakazi ngo bijeje Sebaganwa ko nabafasha ikigo kikaza mu myanya ya mbere, bazamushimira.


Tariki 31 Ukuboza 2019, amanota yarasohotse, ikigo Good Harvest kiza ku mwanya wa cyenda mu gihugu, ndetse abanyeshuri bacyo babiri bashyirwa mu icumi ba mbere.


Umushinjacyaha yavuze ko iyo myanya ikigo cya Gahima cyahawe, ndetse n’iyo abanyeshuri be babonye itandukanye n’ukuri, kuko ngo Good Harvest School yari yabaye iya 143, mu gihe umunyeshuri umwe kuri iryo shuri yakuwe ku mwanya wa 611 ku rwego rw’igihugu agirwa uwa karindwi, naho undi ava ku mwanya wa 229 agirwa uwa cyenda.


Tariki 10 Mutarama 2020, ngo Munyakazi yahamagaye Gahima na Sebaganwa, bahurira muri restaurant i Nyarutarama, basangira ibyo kurya bya saa sita. Ngo bari gusangira, Gahima yatse Dr Sebaganwa urufunguzo rw’imodoka ye, aragenda arafungura ashyiramo ibihumbi 500 Frw.


Ubushinjacyaha buvuga ko Dr Sebaganwa aza guhura n’abo bagabo, yari yaramaze kubimenyeshya ubugenzacyaha ngo butangire iperereza nyuma yo kubigirwamo inama.


Umucamanza yabajije umushinjacyaha impamvu Dr Sebaganwa we atari mu rukiko kandi ibyaha yarabigizemo uruhare, avuga ko Itegeko ryo kurwanya ruswa, rivuga ko nta buryozwacyaha bubaho iyo umuntu watanze cyangwa wakiriye indonke mu rwego rwo gufasha ubutabera kubona ibimenyetso ku cyaha cya ruswa, yabimenyesheje inzego z’ubutabera mbere y’uko icyo cyaha gikorwa.


Rivuga ko nta buryozwacyaha kandi bubaho ku muntu watanze cyangwa wakiriye indonke, ubimenyesha inzego z’ubutabera mbere y’uko ikurikiranwa ry’icyaha ritangira, atanga amakuru cyangwa agaragaza ibimenyetso.


Umushinjacyaha yavuze ko Munyakazi yitwaje ububasha afite nka Minisitiri, asaba Dr Sebaganwa ko Gahima akorerwa ibinyuranye n’amategeko. Avuga ko kandi mu bugenzacyaha no mu bushinjacyaha Dr Munyakazi yabyemeye, ndetse ngo yanasabye imbabazi ubwo yeguraga.


Dr Munyakazi yahawe umwanya ngo yisobanure, avuga ko ibyaha ashinjwa atabyemera kuko nta n’ibyigeze bibaho. Yavuze ko gushinjwa gukoresha ububasha yahawe mu nyungu ze bwite, atari byo kuko atashoboraga gutegeka Dr Sebaganwa gukora ibyo ashaka, kandi bitari mu nshingano ze nka Minisitiri. Munyakazi yavuze ko Dr Sebaganwa yakoreraga muri REB, ikigo kigenga kandi gifite ubuyobozi bwacyo ku buryo bitashobokaga ko amuhatira gukora ibitemewe.


Yavuze ko nta bubasha yari abifitiye kuko iby’ibizamini bitari biri mu nshingano ze. Yabajijwe niba atarigeze ahura na Dr Sebaganwa muri Camp Kigali, Munyakazi avuga ko bahuye ashaka kumubaza amakuru ku bizamini bya Leta byari biri gukosorwa kugira ngo bakomeze imyiteguro y’uburyo amanota azasohoka, kuko bagombaga kuyatangaza mbere y’uko umwaka urangira.


Umucamanza yabajije Munyakazi impamvu batahuriye mu biro bagahurira mu modoka, Munyakazi asubiza ko yari amaze guhamagara Dr Sebaganwa akamubwira ko ari kuri Camp Kigali, Munyakazi yumvise ko ari mu cyerecyezo cy’aho agiye ahitamo ko bahura gato bakaganira kuri ibyo by’amanota.


Abaregwa basabye ko Sebaganwa akurikiranwa


Munyakazi yavuze ko ntabyo kuzamura kigo cya Gahimana baganiriye, icyakora ngo yamuganirije amubwira ko hari inshuti ye (Gahima) ifite ikigo cyaje kubasaba ubufasha, kuko cyari kimaze igihe mu bibazo by’amadeni, ko yazabahuza nk’abakurikirana umunsi ku munsi ubuzima bw’amashuri bakareba niba ntacyo babafasha ikigo kikava mu bibazo cyari kirimo.


Munyakazi avuga ko iyo aza kuba ashaka gufasha Gahima nk’inshuti ye akoresheje ububasha afite nka Minisitiri , hari ubundi buryo yaro gukoresha dore ko Gahima yari amaze igihe yandikiye Mineduc asaba guhabwa icyangombwa kimwemerera guhabwa ubufasha n’abo muri Leta Zunze Ubumwe z’Abarabu, ariko Dr Munyakazi akabyanga akamusaba kubanza kujya muri Minisiteri y’Ububanyi n’amahanga kugira ngo barebe niba abagiye kumuha iyo nkunga bazwi na Ambasade y’u Rwanda.


Kwa Gahima ngo baje no kwaka icyangobwa kibemerera gukora burundu nk’ishuri, Dr Munyakazi yohereza abakora igenzura basanga ikigo cya Gahima hari ibyo kitujuje, gikomeza guhabwa uruhushya rwo gukora rw’agateganyo.


Ibyo Munyakazi avuga ko iyo aba ashaka gufasha Gahima akoresheje ubushuti, yari kumufashiriza aho mubyo yari afitiye ububasha aho kujya gukoresha abandi.


Munyakazi yavuze ko ubwo bahuriraga na Dr Sebaganwa kuri Camp Kigali, Sebaganwa yamubwiye ko kuri ubwo busabe bwo gufasha Gahima nta gisubizo yahita abona, ko azamubwira.


Munyakazi yavuze ko mubyo yabwiye ubushinjacyaha, hari ibindi byongerwemo atavuze kuko atigeze yemera ko yafashije Gahima gutanga ruswa kuri Dr Sebaganwa.


Ngo ibyo Sebaganwa yakoze yabikoze ku giti cye, ntaho bihuriye n’ibyo Munyakazi yamusabye.


Munyakazi kandi yavuze ko akemanga imvugo za Dr Sebaganwa watanze ubuhamya, kuko ngo hashize iminsi amanota y’ibizamini bya Leta asohotse, Dr Sebaganwa yaje mu biro bya Munyakazi, amubwira ko Gahima yamuhaye ishimwe rya miliyoni ebyiri, undi ntiyabtitaho kuko nta bimenyetso yari abifitiye.


Yavuze ko yatunguwe no kugera mu bushinjacyaha, bakamubwira ko Sebaganwa yavuze ko Gahima yamuhaye ibihumbi 500.


Gahima nawe yahawe umwanya ngo yiregure, avuga ko icyaha ashinjwa atakemera kuko nta kigeze kibaho. Avuga ko atigeze asaba Munyakazi kumushyirira ikigo ku myanya ya mbere, kandi ko n’iyo aza kuba utanga ruswa, yari kuyiha Munyakazi aho kuyiha Sebaganwa bataziranye.


Yavuze ko Nyarutarama bamushinja gutangira ruswa, ngo yahagiye agiye guhura na Munyakazi ngo basangire, hashize akanya na Dr Sebaganwa araza, ngo ni ubwa mbere yari amubonye.


Ikindi Gahima atumva, ngo ni uburyo yashoboraga gushuka abantu b’inzobere bafite impamyabumenyi za Dr bombi, ntihagire usesengura ngo arebe ko ibyo agiye gukora bitemewe.


Uyu mugabo kandi yabwiye urukiko ko akemanga ubuhamya bwa Sebaganwa, kuko atumva uburyo icyaha cyabaye mu Ukuboza, nyamara agatanga ikirego muri Mutarama, nta n’undi muntu yigeze abigaragariza mu bayobozi be ko Munyakazi amushyiraho igitutu ngo akore ibitemewe n’amategeko.


Ku kujyana ruswa mu modoka ya Sebaganwa, Gahima yabihakanye, avuga ko nta byabayeho. Yavuze ko atumva uburyo yari kujyana amafarana mu modoka ye ntihagire undi ubibona. Ikindi yavuze ko atumva impamvu atazanye na RIB ngo ibafatire mu cyuho, kandi avuga ko yari yaramaze gutanga ikirego.


Umucamanza yabajije Gahima niba ataratunguwe abonye ishuri rye mu bigo bya mbere mu gihugu, avuga ko atari ubwa mbere kuko no mu 2012 ryabaye irya munani.

ADVERTISEMENT

Munyakazi nawe yabajijwe niba batarabonye ko ari ikibazo ubwo amanota yajyaga gutangazwa Good Harvest iri mu mashuri ya mbere, avuga ko ibyo batabyitayeho kuko urutonde rw’ibigo byatsinze REB yaruzanaga rufunze, kuko ibindi by’amanota byabaga byakorewe mu ikoranabuhanga rya REB.


Ubushinjacyaha bwavuze ko hari n’undi mutangabuhamya wo muri REB, wavuze ko Dr Sebaganwa yaje kumubwira ko bahindura amanota y’ikigo cya Gahima muri systeme ikoreshwa na REB, ngo Sebaganwa ahita ahamagara Munyakazi kugira ngo yumvishe uwo mukozi ushinzwe ikoranabuhanga ko ibyo amubwira byategetswe na Minisitiri.


Umushinjacyaha yavuze ko ibyo bigaragaza uruhare rwa Munyakazi muri icyo cyaha. Ikindi yagaragaje ni uburyo abo bose bahuye inshuro ebyiri mu bihe bitandukanye, nyuma yo guhura hagakorwa ikinyuranyije n’amategeko, ngo ibyo byemeza ko uwo muhuro wabo wabaga ugamije gupanga ikibi.


Munyakazi yavuze ko na Sebaganwa yazanwa mu rukiko agakurikiranwa, kuko ashobora kuba afite undi mugambi mubi amufiteho. Yavuze ko atumva uburyo yashoboraga gushyira ku gitutu Sebaganwa, nk’aho yari mu nshingano ze ntagire n’undi abibwira.


Yavuze ko kandi atumva uburyo ubushinjacyaha bugendera ku buhamya bw’umuntu umwe, atanerekana ibimenyetso simusiga byemeza uruhare rwa Munyakazi. Yavuze ko no kuba yarabwiye ubugenzacyaha ko yahawe ruswa y’ibihumbi 500, nyamara ubwo yahuraga na Munyakazi yaramubwiye ko yahawe miliyoni ebyiri, nabyo byakwibazwaho, ubuhamya bwe bugateshwa agaciro.


Abaregwa babaye nk’abakemanga, bavuga uburyo ubugenzacyaha bwizeye ko Gahima yahawe amafaranga ibihumbi 500, bukanayafatira nk’ikimenyetso kandi nta cyerekana aho ayo mafaranga yavuye. Ikindi bibaza uburyo byemewe ko yahawe ayo mafaranga yonyine, mu gihe mubyo yabwiye Munyakazi yaragaragazaga ko yabonye amafaranga arenze ayo.


Ubushinjacyaha bwahawe umwanya ngo bubasabire ibihano, buvuga ko bwifuza ko Munyakazi ahabwa igifungo cy’imyaka irindwi n’izahazabu ya miliyoni eshanu, naho Gahima agahabwa igifungo cy’imyaka itanu n’ihazabu ya miliyoni ebyiri. Abaregwa bo basabye urukiko kugirwa abere.


Umucamanza yavuze ko umwanzuro uzasomwa tariki 16 Ukwakira 2020 saa munani z’amanywa.


SRC: Igihe


ADVERTISEMENT
Mountains
ADVERTISEMENT


Avatar

Authors get paid when people like you upvote their post.
If you enjoyed what you read here, create your account today and start earning FREE STEEM!

Facebook Comments


VIDEO







Nature
by : FRATERNE MUDATINYA 15 October, 2020










FACEBOOK


Our main page @Rwandatoday.rw loves your style! We are looking for ladies just like you to feature this winter in our collection! Check out my link and lets chat about getting you featured

TWITTER

ADS
ads

Kwamamaza




Contact

Join Us

Links